Քարտեզներում հայտնաբերված սխալների ուղղման կարգը քննարկվեց համայնքների ներկայացուցիչների հետ
«Կադաստրային քարտեզում հայտնաբերված սխալների ուղղման կարգը սահմանելու մասին» ՀՀ կառավարության 2021 թվականի ապրիլի 29-ին ընդունված N 698-Ն որոշման իրականացման շրջանակներում Կադաստրի կոմիտեի Գեոմատիկայի կենտրոնում` կոմիտեի ղեկավարի տեղակալ Արամ Գուգարացի գլխավորությամբ տեղի ունեցավ հանդիպում-քննարկում Հայաստանի Հանրապետության Արարատի մարզի Տափերական, Նոր Կյանք, Փոքր Վեդի, Լուսառատ համայնքների և Կոմիտեի ներկայացուցիչների մասնակցությամբ։
Պիլոտային կարգով վերոնշյալ համայնքներում իրականացվել են համայնքների սահմանների ճշգրտում և կադաստրային քարտեզների ուղղման աշխատանքներ:
Հանդիպման ժամանակ Կոմիտեի ներկայացուցիչները մանրամասն ներկայացրեցին կատարված աշխատանքները և ակնկալվող արդյունքները։ Օրթոֆոտոհատակագծերի հիման վրա ուղղվում են համայնքների վարչական սահմանները, թաղամասերի և անշարժ գույքի (հողամասի) միավորների սահմանները։
Եթե տվյալների ստացման հարցում օրթոֆոտոհատակագծերը չեն բավարարում, կատարվում են դաշտային աշխատանքներ։ Արդյունքում ավելի դյուրին կդառնա թե՛ համայնքային կառավարումը, և թե՛ քաղաքացիների խնդիրների լուծումը։
Կոմիտեի ներկայացուցիչները պատասխանեցին հնչեցված հարցերին, որոնք մեծ մասամբ կապված էին խնդրահարույց դեպքերի հետ և հավաստիացրին, որ ներկայացվելու են օրթոֆոտոհատակագծեր, որտեղ երևալու են բոլոր այդպիսի դեպքերը։ Դրանք քննարկվելու և պարզաբանվելու են համայքների ղեկավարների հետ, որից հետո արդեն վերջնական տարբերակները տրամադրվելու են համայքներին։
Նշվեց նաև, որ երբ քարտեզների ուղղման աշխատանքները վերջնականապես ավարտված կլինեն, բոլորը համայնքները բացառապես պետք է աշխատեն WGS-84 (ARMREF 02) ազգային գեոդեզիական կոորդինատային համակարգով։
Հանդիպման ընթացքում համայնքների ներկայացուցիչները հնարավորություն ունեցան տեսնելու կադաստրային քարտեզների ուղղման աշխատանքների գործընթացը և տեղեկացան իրենց համայնքներում առկա մի շարք անհամապատասխանությունների մասին։
