Մայիսի 25-ից 27-ը  Բելառուսի Հանրապետության պետական գույքի կոմիտեի հրավերով Պինսկում էր  գտնվում Կադաստրի կոմիտեի ղեկավար Սուրեն Թովմասյանի գլխավորած պատվիրակությունը,որի կազմում էին նաև ղեկավարի տեղակալ Արման Պետրոսյանը և կադաստրային գնահատման և շուկայի վերլուծության վարչության պետ Հմայակ Հակոբյանը։  

 Բելառուսի Հանրապետության պետական գույքի կոմիտեում տեղի  ունեցած երկկողմ հանդիպմանը  կոմիտեի նախագահ Դմիտրի Մատուսևիչը և Կադաստրի կոմիտեի ղեկավար Սուրեն Թովմասյանը քննարկել են 2 երկրների անշարժ գույքի գրանցմանը, գեոդեզիայի և քարտեզագրության գործունեությանը, էլեկտրոնային հարթակների կիրառման լայն հնարավորությունների ստեղծմանը,  ինչպես նաև օրենսդրական բարեփոխումներին վերաբերող բազմաթիվ խնդիրներ։

  Մայիսի 26-ին կայացած «Գնահատման գործունեության զարգացում. համաշխարհային, միջազգային,եվրասիական հարթություններ» խորագրով  չորորդ միջազգային գիտաժողովին  մասնակիցները անդրադարձել են  Եվրասիական տնտեսական միության գնահատման միասնական շուկայի ձևավորմանը , Անկախ Պետությունների Համագործակցության և Եվրասիական միության անդամ երկրներում  գնահատման գործունեության կարգավորմանը, ինչպես նաև ճարտարապետական հուշարձանների գնահատման  գիտական և գործնական կողմերին առնչվող  մի շարք խնդիրների։

  Եզրափակելով հանդիպումների շարքը՝ գերատեսչությունների ղեկավարները  հաստատեցին  նմանօրինակ հանդիպումների անցկացման կարևորությունը՝ համոզմունք հայտնելով, որ  երկկողմ  փոխշահավետ  համագործակցությունը անհրաժեշտ է   ամրապնդել և ավելի  զարգացնել ։