Հունիսի 14-ից 16-ը ՀՀ Կադաստրի կոմիտեի ղեկավար Սուրեն Թովմասյանը մասնակցում է Սանկտ Պետերբուրգում ընթացող XXVI Պետերբուրգյան միջազգային տնտեսական համաժողովի (ՊՄՏՀ) շրջանակներում կազմակերպված «Տարածքների գույքագրում: Տարածական տվյալների կիրառման նոր հնարավորություններ» խորագրով նստաշրջանին։

Պետերբուրգյան միջազգային տնտեսական համաժողովը եզակի իրադարձություն է տնտեսության և գործարարության ոլորտում:

Այս տարվա  տնտեսական համաժողովի առանցքային թեման է «Սուվերեն զարգացումը՝ որպես արդար աշխարհակարգի հիմք: Միավորենք ջանքերը հանուն ապագա սերունդների»:

Հերթական անգամ հարթակ տրամադրվեց համաշխարհային գործարար համայնքի ներկայացուցիչներին, պետական գործիչներին,  մասնագիտական համայնքի ներկայացուցիչներին՝ համաշխարհային տնտեսության արդի խնդիրների քննարկման, համագործակցության ամրապնդմանն ու ընդլայնմանն ուղղված որոշումների կայացման համար:

Համաժողովն անցկացվում է 1997 թվականից սկսած, իսկ 2006 թվականից՝ Ռուսաստանի Դաշնության նախագահի բարձր հովանավորությամբ և մասնակցությամբ։

Համաժողովի շրջանակներում անցկացվում  են պանելային և կլոր սեղան ձևաչափով քննարկումներ, հեռուստաբանավեճեր, Շանհայի համագործակցության կազմակերպության և ԵՏՄ անդամ պետությունների ներկայացուցիչների հետ հանդիպումներ:

Սուրեն Թովմասյանն այսօր ներկայացրել է զեկույց՝ «Հայաստանի Հանրապետության ազգային տարածական տվյալների ենթակառուցվածքի ներկա իրավիճակը» թեմայով։