2025 թվականի մարտի 24-ից 29-ը Հնդկաստանի Հանրապետության Գուրուգրամ քաղաքում Հնդկաստանի տեխնիկական և տնտեսական համագործակցության ծրագրի ներքո կայացել է հողերի կառավարման միջազգային աշխատաժողովը, որին մասնակցել է նաև Կադաստրի կոմիտեի Գեոմատիկայի կենտրոնի կառուցվածքային ստորաբաժանումներում առանձին գործառույթներ համակարգող խորհրդական Հայկ Հակոբյանը։

Աշխատաժողովի շրջանակում քննարկվել են հողերի կառավարման տեխնոլոգիաների արդիականացման, ռեսուրսների մոբիլիզացման և կառավարման, անօդաչու թռչող սարքերի հիման վրա իրականացվող ցամաքային հետազոտությունների պլանավորման, ինչպես նաև բարձր լուծաչափով անօդաչու թռչող սարքերով կազմված քարտեզների և հավաքագրված տվյալների արդյունավետությանն առնչվող թեմաներ։

Աշխատաժողովի եզրափակիչ փուլում կազմակերպիչները և մասնակից երկրների պատվիրակները հայտնել են իրենց պատրաստակամությունը զարգացնելու երկկողմ և եռակողմ համագործակցությունը՝ հողերի կառավարման ոլորտում գիտելիքների, փորձի փոխանակման ուղղությամբ։